raat...

Chaand tab aaeena sa lagtaa tha..

Raat lagṭi thee jyoṅ resham ka libaas...

Kabhi kaajal si laga kartee thee..
Kabhi sandal ke jungalon jaisee..

Raat sharmaayee hui aatee thee,
Aur badee der tak ṭhehertee thee ....

Raat ab roshnaai ho jaise..
Unki kalamon meiṅ basaa kartee hai..

Unke kaaġaz pe kahaani kabhi..
kalaam banee... Raat shokhi se bikhar jaati hai..

Raat ab mere paas aati nahi...

Haaṅ magar, der tak thehertee hai....

Unke pannon Ke khwabgahon mein..
Raat khwaabeeda see bhataktee hai...

Neend jab karwatein badalti hai...
Raat, kuchh door hi thithaktee hai..

Mujhko kan-Khee se dekha Karti hai............

Aur Bahut der tak thehertee hai..

Bhai ke janmdin par....

Jab woh chhota tha.....bahut kam boltaa tha..
bas dekhtaa tha gaur se, aur toltaa tha...

baadlon ke pul banaata aasmaan me...
chaand ke jhoole pe chadh kar doltaa thaa..

khilkhilaata tha woh apnee nanhee kanjee aankhon se yun..
jyon, tumhe padh kar thitholi kar rahaa ho...

sataata tha mujhe tab bhi, aur ab bhi hai sataata
meraa bhai jo sare-raah, mere dushman moltaa tha...

meri didi ko dekha kya?kahaan hai? aayegi kab?
mohalle bhar mein dhoondhaa kartaa tha, jab naa miloon toh...

aur jab main paas aa jaaoon toh kehta tha -
"tu jaa waapas , tu kyon aayi"
mere kaanon mein aksar aisee misree gholtaa thaa..

ab badaa hai......

hain baadal par pulon ke jaal sach mein baandh daale...
boodhe chaand se hai badh gayi ab naate daari

woh aksar sair par jaata hai sitaaron, kaaynaaton, kehkashaan ke beech..
khudaa ne hai badhaa dee uspe jag ki zimmedaari..

woh ab toh boltaa hai- kam se thodaa aur zyaada
woh ab bhi dekhta hai gauṛ se aur toltaa hai...

mujhe dikhtaa magar hai- chhota pehre-daar mera..
jo awwal aata toh tha, par jaane kab kitaab kholtaa tha....